Man vas ná hy NS premier wou opblaas
2012-05-11 11:30
Wellington – ‘n Man wat gedreig het om Nieu-Seeland se eerste minister, John Key, op te blaas terwyl hy by ‘n restaurant geëet het, is Vrydag volgens mediaberigte tot 13 maande tronkstraf gevonnis.
Keith William Mabey (22), wat aan skisofrenie ly, het aan sielkundiges gesê hy droom al sedert Key in 2009 as die eerste minister aangestel is, daarvan om hom dood te maak.
Mabey sê hy het geweet by watter restaurant Key en sy vrou elke Donderdag geëet het en sê hy het beplan om in te stap en hom op te blaas.
Hy het glo navorsing op die internet gedoen oor hoe om bomme te maak en het suksesvolle toetse uitgevoer.
Tydens Vrydag se vonnisoplegging het Mabey se prokureur gesê hy neem nie medikasie om sy gemoed te beheer nie en het aansoek gedoen vir tuis-aanhouding.
Nietemin het regter Les Atkins beslis dat tronkstraf die enigste “gepaste” vonnis is.
Mabey is vir vier maande tronk toe gestuur omdat hy gedreig het om Key dood te maak en nog nege maande vir aanklagte dat hy gedreig het om sy lewensmaat te vermoor, aanranding en gevaarlike bestuur, het Radio New Zealand berig.
– Volg Nuus24 op Twitter
- Sapa - AFP
