Man tot Januarie in aanhouding ná meisie verdwyn

2012-10-10 16:00

Londen – Mark Bridger, die man wat daarvan beskuldig word dat hy die vermiste vyfjarige April Jones vermoor het, sal tot 11 Januarie 2013 in aanhouding moet bly.

Bridger (46) het in die Caernarfon Crown-hof met behulp van 'n videoskakel vanuit die tronk in Manchester verskyn.

Bridger, wat voor 'n groen gordyn gesit het, was ongeskeer en het 'n swart sweetpaktop aangehad. Hy het kalm voorgekom en geluister na wat in die hof gebeur het. 

Hy is Saterdag aangekla vir die moord en ontvoering van Jones asook van regsverydeling.

Bridger moet weer op 11 Januarie in die hof verskyn wanneer hy gevra sal word om te pleit.

Die soektog na Jones duur voort in Machynlleth.

– Sky News.

– Volg Nuus24 op Twitter.