Man sterf ná hy kakkerlakke by kompetisie eet
2012-10-09 08:15
Miami – Die wenner van 'n kompetisie, waar deelnemers kakkerlakke moes eet, het in Suid-Florida gesterf kort nadat hy van die lewende insekte asook wurms geëet het, het owerhede Maandag gesê.
Ongeveer 30 deelnemers het die insekte tydens Vrydagaand se kompetisie by die Ben Siegel Reptile-winkel in Deerfield Beach geëet.
Edward Archbold (32) het siek geword kort nadat die kompetisie geëindig het en het voor die winkel ineengestort.
Hy is na die hospitaal geneem waar hy dood verklaar is. Owerhede wag nog vir die nadoodse verslag om die oorsaak van sy dood te bepaal.
"Tensy die kakkerlakke besmet was met bakterieë of ander patogene, dink ek nie dit is gevaarlik om kakkerlakke te eet nie," het Michael Adams, 'n professor by die universiteit van Kalifornië, gesê.
Hy sê hy het nog nie gehoor van iemand wat gesterf het nadat hulle kakkerlakke geëet het nie, hoewel sommige mense dalk allergies daarvoor kan wees, het hy bygevoeg.
Nie een van die ander deelnemers het siek geword nie.
– Volg Nuus24 op Twitter.
- AP
