Man steek homself aan die brand op besige plein
2011-04-06 18:00
Amsterdam – ‘n Man het homself voor ‘n nasionale monument in sentrale Amsterdam, Nederland, aan die brand gesteek, het polisie en ooggetuies gesê.
Foto’s van Woensdagmiddag se dramatiese voorval het sosiale media en webtuistes binne enkele minute aan die gons gehad.
Een foto het gewys hoe die slagoffer op sy rug lê terwyl talle mense probeer om die vlamme met hul jasse dood te slaan.
Nooddienste het op die Dam-plein opgedaag om die vlamme met water te blus.
‘n Gedeelte van die plein is afgesper terwyl die slagoffer behandeling ontvang het. Hy is daarna na ‘n hospitaal geneem.
“’n Persoon het homself op die Dam aan die brand gesteek,” het polisie in Amsterdam op Twitter gesê.
Daar is geen onmiddellike inligting oor die man se toestand of sy identiteit beskikbaar nie.
Ooggetuies het aan die Nederlandse nasionale uitsaaier NOS gesê die man het Nederlands met ‘n buitelandse aksent gepraat en dat hy geen “politieke motief” gehad het nie.
Volg Nuus24 op Twitter.
- Sapa - AP