Man skiet talle op trein, dood homself

2011-07-18 10:22

Santiago – Polisie in die Chileense hoofstad sê ‘n man op ‘n ondergrondse trein het ‘n vuurwapen uitgeruk en op mense begin skiet.

Volgens die polisie het hy twee mense doodgeskiet en vier ander gewond voordat hy homself om die lewe gebring het.

Die skietery het Sondag by die Plaza Maipu-stasie in die suidwestelike deel van Santiago plaasgevind.

Polisie sê die gewapende man het op die laaste wa van die trein geklim en begin skiet. ‘n Ooggetuie sê hy het minstens nege skote afgevuur.

Volgens die polisie het die man van die trein afgeklim en die stasie verlaat. Hy het daarna na ‘n nabygeleë plein gestap en homself doodgeskiet.

Twee passasiers is op die trein doodgeskiet. Drie ander is ernstig gewond terwyl ‘n vierde passasier ligte beserings opgedoen het.

Owerhede sal die motief probeer vasstel.

Volg Nuus24 op Twitter.

- Sapa - AP