Man sê hy's te vet om te moor
2009-10-28 23:30
Trenton, New Jersey - 'n Man wat daarvan verdink word dat hy sy destydse skoonseun vermoor het, sê hy was te vet om dié moord te pleeg.
Wanneer Edward Ates Donderdag die getuiebank inneem, sal hy aanvoer dat hy te min energie gehad het om Paul Duncsak te skiet en weg te kom.
Ates was ten tyde van die moord in 2006 1.72m lank en het 129kg geweeg.
Duncsak en Ates se dogter was betrokke in in hofgeding oor toesig ná hul egskeiding.
Die staatsaanklaers voer egter aan dat Ates van Florida na Duncsak se huis in Ramsey gery, die trappe geklim en hom geskiet het.
'n Regsverteenwoordiger van die verdediging sê Ates se gewig het asma, slaapapnee en ander kwale veroorsaak.
– Sapa-AP