Man pleeg selfmoord toe mark val
2011-08-10 13:41
Seoul – ‘n Werknemer van ‘n Suid-Koreaanse finansiëledienste-firma het
selfmoord gepleeg deur by ‘n woonstelgebou af te spring toe sy kliënte groot verliese in ‘n daling in die
aandelemark gely het.
Volgens die polisie is die 48-jarige man genaamd Seo naby sy
woonstel in die suid-oostelike stad Daegu gevind, nadat hy ‘n selfoonboodskap
aan vriende en familie gestuur het waarin hy oor die gly in die mark gekla het.
Hy het in die boodskappe gesê die pryse van sy kliënte se
aandele het gedaal en dat hy vir hulle jammer voel, het ‘n polisiewoordvoerder
in Daegu gesê.
Hy het gesê Seo “het homself glo doodgemaak” en bygevoeg dat
die polisie op kringtelevisiemateriaal kon sien hoe hy alleen uit die hysbak op
die 18de verdieping van die woonstelgebou klim, oomblikke voor hy dood op die
grond aangetref is.
Die Kospi, die Suid-Koreaanse aandelemark, het Dinsdag 3.64%
laer saam met ander Asiatiese markte gesluit weens vrese aangevuur deur die
afrgradering van Amerika se kredietstatus en Europa se skuldprobleme.
Die indeks het Woensdagoggend ietwat herstel en 0.27% hoër
gesluit.
Suid-Korea het een van die wêreld se hoogste
selfmoordsyfers. Meer as 15 000 mense uit ‘n bevolking van 50 miljoen het in
2009 selfmoord gepleeg.
– Volg Nuus24 op
Twitter.
- Sapa - AFP