Man pleeg regstreeks selfmoord op internet
2010-11-10 14:02
Tokio – 'n Japannese man het regstreeks op die internet selfmoord gepleeg nadat aanlyngebruikers hom uitgedaag het om te sterf.
'n 24-jarige man in die noordelike stad van Sendai is Dinsdagoggend deur die polisie in sy woonstel gevind nadat hulle boodskappe van webgebruikers ontvang het, het die Japannese koerant Yomiuri Shimbun berig.
Die man, wat alleen gewoon het, is sedert Augustus met verlengde siekteverlof en het klagtes oor sy werk op die internet gepubliseer.
Hy het Sondagaand beelde van homself op Ustream uitgesaai en sy siening oor die lewe en sy plan om homself om die lewe te bring aangekondig.
Die uitsending is vir 'n rukkie gestaak en is Dinsdagoggend vroeg hervat, waarna hy homself omstreeks 22:30 Dinsdagaand gehang het.
Sy uitsending het baie boodskappe ontvang, met sommige gebruikers wat hom aanmoedig om hom gou dood te maak, terwyl ander gevra het dat hy liewer sy planne laat vaar.
Ustream het Dinsdag die uitsending gestaak ná berigte van 'n toenemende aantal kykers.
Die plaaslike polisie kon nie onmiddellik kommentaar lewer oor die verslag nie.
Japan is een van die lande met die hoogste selfmoordsyfers ter wêreld en het vir die 12de agtereenvolgende jaar 30 000 sterftes verbygesteek.
Meer as 32 000 mense het verlede jaar in die land selfmoord gepleeg.
Volg Nuus24 op Twitter
- SAPA