Man laat nuwe bruid verdrink
2009-09-18 10:59
Sydney – ‘n Amerikaanse verkoopsman, wat weggeswem het toe sy nuwe vrou gedurende hul wittebrood met ‘n duikekspedisie op die seebodem dood is, gaan ‘n bykomende ses maande in die tronk spandeer nadat ‘n appèl bekragtig is
Die 32-jarige David “Gabe” Watson is in Junie tot vier en ‘n half jaar vir manslag gevonnis, maar na ‘n pleitonderhandeling het hy drie en ‘n half jaar afgekry.
Na die pleitonderhandeling hoef hy slegs 12 maande van sy straf uit te dien, ‘n besluit wat baie woede veroorsaak het.
Die 26-jarige Christina Watson is in Oktober 2003 dood nadat sy gedurende hul wittebrood in die moeilikheid gekom het terwyl hulle by ‘n wrak op die kus van Queensland geskubaduik het.
‘n Duikinstrukteur het haar van die seebodem gaan haal nadat Watson nie haar noodbaadjie laat opblaas het en ook nie haar duikgewigte afgehaal het sodat sy na die oppervlak kon dryf nie.
Hy het haar gelos terwyl hy vir hulp gaan soek het.
Cameron Dick, Queensland se prokureur-generaal, het appèl aangeteken teen die een jaar tronkstraf en gesê dit is “klaarblyklik onregverdig” en dat dit nie die erns van die saak weerspieël nie.
In ‘n 2-1 besluit Vrydag in Brisbane het die hof die appèl bekragtig en beslis dat Watson eers na 18 maande sal kan vrykom.
Terwyl een van die regters gesê het dat Watson verdien om langer toegesluit te word het die hof nie saamgestem om hom twee en ‘n half jaar, soos Dick versoek het, te laat uitdien nie.
- Sapa