Man hou meisie gyselaar in Sydney
2011-09-06 10:07
Sydney – Die polisie het Dinsdag ‘n regsfirma omring en ‘n voorstad in Sydney ontruim nadat ‘n man na bewering ‘n meisie gyselaar geneem het, het die nuusagentskap AFP berig.
Die Australiese Associated Press het intussen berig die meisie is die man se dogter. Daar word vermoed dat die meisie omtrent 12 jaar oud is.
Daar is onbevestigde berigte dat die man ‘n bom by hom het. Die polisie wou nie kommentaar hieroor lewer nie.
“In die stadium is dit nie bekend hoekom die man by die gebou is of wat in sy besit is nie,” lui ‘n polisieverklaring.
Volgens die verklaring is paaie in die Parramatta-gebied in die weste van Sydney gesluit en geboue is ontruim.
‘n Polisiewoordvoerder sê onderhandelaars is tans op die toneel wat naby die stad se familiehof geleë is.
Die woordvoerder het bygevoeg dat nooddienswerkers en brandbestryders ook op die toneel is.
Televisie-beeldmateriaal wys hoe die middeljarige man sonder ‘n hemp by ‘n kantoorventer uitkyk. Hy het ‘n prokureur se pruik op sy kop.
Volgens ‘n ooggetuie het die man gesê hy het ‘n bom nadat hy saam met ‘n meisie by die prokureurskantore ingestap het.
“Hy’t gesê hy is op soek na ‘n sekere mens,” het die vroulike klerk van Arthur Phillip Chambers vertel. Sy wou nie geïdentifiseer word nie.
“Ek het hom vertel dat hy nie hier is nie. Ek het hom vertel dat hy nie een van ons kliënte is nie. Ek weet nie wie hy is nie,” het sy gesê.
Daarna het die man glo na die volgende verdieping gegaan en weer na die grondvloer gestap. Die klerk sê die man het weereens gevra waar die persoon is.
“Hy het na die voorkant van die gebou gegaan en gesê: ‘Bel die advokaat-generaal se departement, bel (hierdie persoon) en sê vir hulle ek het ‘n bom in my rugsak.’”
Kliek hier vir Sky News se video oor die deurlopende gyselaarsdrama.
Volg Nuus24 op Twitter.
- AFP