Pa gooi kind van Melbourne-brug af
2011-03-09 07:23
Sydney – ‘n Australiese man het sy vierjarige dogter van ‘n 58 m hoë brug tydens spitsverkeer afgegooi nadat sy vrou hom twee jaar gelede geskei het, het ‘n hof Woensdag gehoor.
Arthur Freeman (37) het skuld ontken op aanklag van sy dogter, Darcey, se moord.
Die slagoffer se broer, Ben (6), het via ‘n video-onderhoud aan die hof vertel hoe sy pa die motor op die Melbourne-brug gestop het. Volgens Ben het sy pa rustig die kind oor die rand gegooi voordat hy aanhou ry het.
“Sy het nie eers geskree toe sy val nie,” het die seun in die opname gesê.
“Ek het gesê ‘gaan terug en kry haar’, maar pa het aanhou ry. Toe sê ek ‘Darcey kan nie swem nie.’”
Freeman het die egskeiding ‘n dag voor Darcey se dood gefinaliseer, het die hof gehoor.
Tydens Freeman en sy eks-vrou se laaste gesprekke het hy glo vir haar gesê om haar kinders te groet, want sy "sal hulle nooit weer sien nie.”
Volg Nuus24 op Twitter.
- Sapa-DPA