Man gooi baba van brug af
2010-02-18 13:45
Woodbridge – ‘n Amerikaanse man het aan die polisie erken dat hy sy baba vanaf ‘n brug, in ‘n rivier in New Jersey gegooi het.
Verskeie bote, snuffelhonde en helikopters is ingespan tydens 'n soektog na die baba. Nooddienswerkers was Woensdag steeds onverpoos besig om te soek na die drie maande oue Zara Malani-lin Abdur, wat Dinsdag uit die arms van haar ouma gesteel is.
Volgens owerhede het die 21-jarige pa, Shamsiddi Abdur-Raheem, Dinsdagmiddag toegang tot die ouma se woonstel verkry, haar in die gesig geslaan, verwurg en die baba uit haar arms geruk.
Die 60-jarige ouma, wat om veiligheidsredes nie geïdentifiseer kan word nie, het Abdur-Raheem agternagesit en voor sy motor ingespring. Sy is by ‘n plaaslike hospitaal vir haar beserings behandel en later ontslaan.
Abdur-Raheem is vier ure na die ontvoering in hegtenis geneem, en het glo aan die polisie erken dat hy die baba by die brug afgegooi het.
Hy het glo na die voorval met sy imam gaan konsulteer, wat hom toe na een van sy familielede geneem en die polisie ontbied het.
Abdur-Raheem staar nou klagtes van ontvoering, poging tot moord, aanranding met die opset om ernstig te beseer asook die bedreiging van ‘n kind se lewe, in die gesig.
Die kind se ma, Venette Benjamin, wat alleentoesig oor die peuter het, was ten tyde van die voorval in ‘n hof, besig om ‘n interdik teen Abdur-Raheem te kry.
Volgens Mitchell Liebowitz, haar prokureur, was die baba ontvoer nog voordat die interdik uitgereik is.
- Sapa