Man glo deur sy varke gevreet
2012-10-02 09:35
Coquille – Beamptes in Oregon ondersoek hoe ‘n boer deur sy varke gevreet is.
Terry Vance Garner (69) het nooit teruggekeer nadat hy sy diere verlede Woensdag op sy plaas naby die Oregon-kus gaan voer het nie, het die distriksprokureur in die Coos-provinsie Maandag gesê.
‘n Familielid het Garner se kunstande en dele van sy lyk ure later in die varkhok gevind, maar die meeste van sy oorskot was reeds geëet, het die distriksprokureur, Paul Frasier, gesê.
Verskeie van die varke het 318 kg en meer geweeg.
Die moontlikheid bestaan dat Garber ‘n mediese noodgeval soos ‘n hartaanval gehad het of dat hy deur die diere omgegooi, doodgemaak en geëet is, het Frasier gesê.
Hy het bygevoeg dat minstens een vark al voorheen vir Garner gebyt het.
Die moontlikheid van gemene spel word ook ondersoek.
“Vir al wat ons weet, was dit ‘n verskriklike ongeluk, maar dit is so vreemd dat ons na alle moontlikhede moet kyk,” het Frasier aan The Register-Guard gesê.
‘n Patoloog kon nie ‘n oorsaak van sy dood bepaal nie, het die koerant berig.
Sy oorskot sal deur ‘n forensiese antropoloog by die Universiteit van Oregon ondersoek word.
Terry Garner was “’n ou met ‘n goeie hart” wat omgesien het na verskeie groot volwasse sôe en ‘n beer genaamd Teddy, het sy broer, Michael Garner (75), van Myrtle Point gesê.
– Volg Nuus24 op Twitter
- Sapa - AP
