Man 'emosieloos' ná hy glo student in Parys vermoor

2012-09-04 13:58

Parys – Die verhoor van ‘n onwettige taxibestuurder en veroordeelde verkragter wat daarvan aangekla is dat hy ‘n Sweedse student buite ‘n nagklub ontvoer en vermoor het, het Dinsdag in Parys begin.

Die moord op Susanna Zetterberg het groot opslae gemaak in Frankryk en Swede nadat haar gedeeltelik verkoolde lyk naby Parys gevind is.

Die 19-jarige van Stockholm, wat Frans studeer en deeltyds in ‘n kafee in Parys gewerk het, is in 2008 vermoor.

Bruno Cholet (55) ontken die aanklagte van ontvoering en moord en beweer die polisie het die bewyse teen hom opgemaak.

Hy kan tot lewenslange tronkstraf gevonnis word indien hy skuldig bevind word in die verhoor wat tot 14 September sal duur.

Cholet, ‘n oorgewig man met dik brille, was emosieloos toe regter Xaviere Simeoni hom gevra het om sy naam en adres aan die begin van die verhoor te gee.

Hy het die antwoorde gemompel en het in ‘n stadium deurmekaar gelyk.

Die verhoor is uitgestel nadat Cholet gesê het hy voel ongesteld. Dit is onduidelik wanneer die saak voortgesit sal word.

– Volg Nuus24 op Twitter

 

- Sapa - AFP