Man deur tier verskeur ná hy in hok spring
2012-09-22 08:23
New York – 'n Man het ernstige bytwonde aan sy liggaam opgedoen nadat hy Vrydag in 'n Siberiese tier se hok by die Bronx-dieretuin in New York gespring het.
Die man (25) het met die dieretuin se trein op 'n enkelspoor bo die hokke gery toe hy vanaf die trein in die tier se kamp gespring het, het amptenare Saterdag in 'n verklaring gesê.
Noodwerkers het gesê die man het ernstige bytwonde aan sy arms, bene en skouer opgedoen tydens die 10 minute wat hy alleen saam met die tier in die hok was.
"Een been is ernstig beseer," het Frank Dwyer, 'n woordvoerder vir die brandweer-departement, gesê alhoewel hy nie vroeë berigte kon bevestig dat die man 'n voet in die aanval verloor het nie.
Noodwerkers het brandblussers gebruik om die dier te verwilder.
Die Siberiese tier genaamd Bachuta is 11 jaar oud en weeg 180 kg.
Die dieretuin se direkteur, Jim Breheny, het gesê alhoewel die voorval ondersoek word, hulle die dier nie van kant sal maak nie.
Breheny het gesê die voorval "was net 'n buitengewone gebeurtenis wat plaasgevind het omdat iemand probeer het om homself in gevaar te stel."
"In hierdie geval het die tier niks verkeerd gedoen nie," het hy gesê.
Volg Nuus24 op Twitter.
- Reuters
