Man agter anti-Islam rolprent verskyn in hof
2012-10-10 13:32
Los Angeles – 'n Man van Kalifornië wat agter die anti-Islam film is, wat geweld in die Midde-Ooste veroorsaak het, sal Woensdag deur 'n regter gevra word of hy sy borgtogvoorwaardes ná ‘n skuldigbevinding aan bedrog oortree het.
Volgens staatsaanklaers het Mark Basseley Youssef (55) agt keer sy borgtogvoorwaardes verbreek. Hy het ook leuens aan sy proefbeampte vertel en het verskillende name gebruik. Indien Youssef die bewerings teen hom ontken, sal die regter waarskynlik 'n verhoor skeduleer, waar bewyse gegee kan word.
Youssef is sedert 28 September in aanhouding nadat hy in hegtenis geneem is vir die verbreking van sy borgtogvoorwaardes. 'n Regter het daarna ook bevind dat hy 'n vlugrisiko is.
Youssef het weggekruip nadat 'n 14 minuut lange voorprent van die film Innocence of Muslims op YouTube gepubliseer is.
Gewelddadige betogings oor die film het in Egipte en Libië uitgebreek en geweld, wat verband hou met die film, het tot die dood van talle mense gelei.
Moslems het gevra dat Youssef gestraf moet word en 'n Pakistanse kabinetsminister $100,000 aangebied het vir enigeen wat hom doodmaak.
Volgens owerhede is Youssef nie agter tralies oor die film of die inhoud daarvan nie. Hulle het gesê Youssef het nie die waarheid oor sy identiteit gepraat nie, en het verskillende name gebruik sedert hy in 2010 skuldig bevind is aan bedrog.
Youssef was tot 21 maande tronkstraf gevonnis. Hy was verbied om sonder die toestemming van sy proefbeampte rekenaars of die internet vir vyf jaar te gebruik, hoewel staatsaanklaers sê die voorwaardes wat hy verbreek het hou nie verband met die internet nie.
– Volg Nuus24 op Twitter.
- Sapa - AP
