Man aangekla oor bomgrap by lughawe

2012-11-27 09:15

Miami – 'n Terminaal by die Miami Internasionale Lughawe is gedeeltelik ontruim nadat 'n man gesê het hy het dinamiet in sy bagasie.

Die polisie het gesê die 63-jarige Alejandro Hurtado van Guatemala het die uitlating Maandag gemaak toe 'n kaartjie-agent van die Taca-lugredery hom gevra het of hy enige gevaarlike toestelle by hom het.

Volgens die polisie het die kaartjie-agent die polisie gebel, waarna die man gesê het hy maak 'n grap.

Die bomeenheid het Hurtado se sak deursoek, maar geen plofstof gevind nie.

Hurtado is daarvan aangekla dat hy valslik 'n bom by 'n lughawe aangemeld het.

Beamptes by die lughawe het gesê die ondersoek het 'n vlug met 'n uur vertraag. Sommige ander internasionale vlugte is ook weens die ontruiming vertraag.

– Volg Nuus24 op Twitter

- Sapa - AP