Man aan die brand gesteek in Melbourne
2010-01-09 14:04
Melbourne - ‘n Indiese man in Melbourne is met petrol natgegooi en aan die brand gesteek, wat deur die Indiese gemeenskap gesien word as nog ‘n insident van rassehaat.
Die 29-jarige man se toestand is kritiek na hy brandwonde op 15% van sy liggaam opgedoen het.
Polisie in Melbourne is op soek na vier mans wat blykbaar die man met petrol natgegooi het en hom met ‘n sigaretaansteker aan die brand gesteek het.
Hulle is nie seker oor die motivering of die omstandighede rondom die aanval wat in die vroeë oggendure plaasgevind het nie.
Presies ‘n week gelede is Nitin Garg (21), ‘n universiteitstudent van Indië, op pad na sy werk in ‘n kitskosrestaurant doodgesteek.
Die polisie het ontken dat dié moord deur rassehaat aangespoor is, ten spyte van die feit dat die student se selfoon en beursie nie gesteel is nie.
Indiese studente is gereeld slagoffers van straatmisdaad.
- Sapa