Man (80) maak amok op vlug
2010-03-19 15:43
Manila – ‘n 80-Jarige Amerikaanse man is Vrydag in die Filippyne in hegtenis geneem nadat hy ‘n venster op ‘n Filippynse vlug beskadig het, tydens ‘n histerie-aanval, het lughawe polisie gesê.
Rex Maybert Hampton van Portland, was onderweg na die sentrale provinsie van Cebu toe hy skielik die vliegtuig se venster beskadig het. Die vliegtuig was toe net vir sowat 30 minute in die lug, het supt. Joey Salido, polisiewoordvoerder, gesê.
Volgens Salido het Hampton saam met sy Filippynse vrou en neef gereis.
“Hy het glo histeries geword en wou uit die vliegtuig klim. Dis hoekom hy die venster beskadig het,” het hy gesê.
Hampton se vrou het onmiddellik die hulp van lugpersoneel ingeroep.
Volgens sy vrou het Hampton paranoïes geword omdat hy glo iemand gesien het wat hy gedog het wou hom doodmaak, het Salido gesê.
Die vliegtuig het veilig en volgens skedule op die Cebu-lughawe geland, waar Hampton onmiddellik gearresteer is.
Salido het gesê die polisie gaan ‘n kriminele klag teen hom aanhangig maak omdat hy die lewens van ander passasiers in gevaar gestel het en ook omdat hy die vliegtuig beskadig het.
- Sapa