Man (75) in hof oor beweerde kindermishandeling

2012-09-07 21:26

Parys – ‘n Vyf-en-sewentigjarige Franse noodlenigingswerker se verhoor het Vrydag in Parys begin ná die verkragting van drie dowe seuns in Indonesië tussen 1997 en 2004.

Gerard Carayon, wat in Java se hoofstad Yogyakarta woon, het die aantygings ontken.

Carayon het ‘n nie-regeringsorganisasie bestuur wat kinders gehelp het. Sommige van hulle het ook by sy huis gewerk.

‘n Franse diplomaat in Djakarta het die polisie in Indonesië in 2004 van sy vermoedens ingelig dat Carayon kinders by sy huis of by ‘n hotel seksueel mishandel.

‘n Ondersoek is van stapel gestuur en die seuns het vir ‘n Indonesiese onderwyser gesê hulle is verkrag of mishandel en is soms selfs geld gegee in ruil vir seks.

Carayon, wat homself as ‘n skilder beskryf, het die aantygings in die hof ontken.

Nadat die getuienis van ‘n vermeende slagoffer in die hof uitgelees is waarin beweer word hy was ‘n seksslaaf, het Carayon gesê: “Dis nie waar nie.”

Hy is in 2008 by Parys se Charles de Gaulle-lughawe in hegtenis geneem terwyl hy van Kambodja teruggekeer het.

Hy is ná 18 maande se aanhouding in Maart 2010 vrygelaat onder ‘n geregtelike hersiening, waarna hy verdwyn het.

Hy is weer in Augustus naby Frankryk se grens met Italië in hegtenis geneem.

– Volg Nuus24 op Twitter

 

- Sapa - AFP