Man 12 uur lank aangehou ná hy vrou soen

2012-08-07 07:31

Leon, Mexiko – Paartjies van alle ouderdomme het mekaar buite 'n kerk in die konserwatiewe stad van Leon in Mexiko gesoen uit protes teen die inhegtenisneming van 'n man wat sy vroulike metgesel gesoen het.

Dié protesoptog is Sondag gehou en sommige van die lidmate van die Katolieke kerk het selfs die mense toegejuig.

Manuel Berumen (38), 'n universiteitsdosent, is 12 uur lank aangehou nadat hy sy lewensmaat gesoen het terwyl hulle gestap het. Die paartjie se vierjarige seun het ook saam met hulle gestap.

"Ek het Mayra gesoen, niks buitengewoon nie. Toe hoor ons iemand skree 'daar is kinders hier, kinders!' asof ons naak was en pornografiese dade in die straat gedoen het," het Berumen aan joernaliste gesê nadat hy 'n klag by die land se menseregte-groep ingedien het.

Berumen en sy lewensmaat is aangekla van oortredings teen moraliteit, maar slegs hy is in hegtenis geneem.

– Volg Nuus24 op Twitter

- AFP