Malema se tugverhoor trek aandag in Europa
2011-09-01 08:03
Den Haag – Julius Malema se tugverhoor deur die ANC en die geweldpleging daaromheen het groot aandag in die Europese media getrek. Die BBC en die Duitse nuusuitsendings het nuusitems daaroor gehad, en die meeste koerante dra prominente berigte.
Die berigte wissel van streng feitelik tot kwaai negatief vir sowel Malema as die ANC.
The Independent (Londen) gaan die verste. In ’n skerp hoofartikel skryf die koerant:
“Julius Malema is alles wat ’n Afrikaleier nié moet wees nie.
“Die hoof van die ANC se jeugvleuel is charismaties en gewild maar – met sy vloermoere, uitspattige lewenstyl, rassistiese retoriek, onverdraagsaamheid teenoor afwykende denke, suiwering van vyande, elektorale manipulasie en ekonomies ruïnerende beleid – hy is ’n terugkeer na die vasteland se mees rampspoedige tradisies.”
In The Guardian (Londen) skryf Peter Walker as pres. Jacob Zuma Malema nie behoorlik vasvat nie, kan dit die president lelik skade aandoen. En Alan Cowell skryf in die New York Times eweneens as Malema vrygespreek word, kan dit die einde van Zuma se politieke loopbaan beteken.
Die BBC het die politieke kommentator Aubrey Matshiqi só op sy webwerf aangehaal: “Dis ’n geveg tot die bitter einde. Dié geveg sal nie deur punte beslis word nie. Dit sal ’n uitklophou wees.”
Vastelandse Europese koerante het in soortgelyke trant berig. In die linkse Duitse koerant Tageszeitung (Berlyn) wys Martina Schikowski daarop dat Malema groot aanhang onder jong swartes het, maar dat sy eise om die nasionalisering van die myne en landbougrond en sy rassistiese uitlatings oor wittes vir baie in die ANC te ver gaan.
Die Welt (Berlyn) meen die ANC vertoon “ondoeltreffend, verdeeld en met ’n swak leiding”. Die koerant verwys selfs na ’n “leierskrisis”.
Klaus Huhold skryf in die Wiener Zeitung (Wenen) dat Malema die onmiskenbare ontevredenheid van die jeug “in gevaarlike bane lei en dikwels die fragiele eenheid in die land in gevaar bring”.
Die Nederlandse NRC Handelsblad (Rotterdam) se Peter Vermaas berig dat daar argwaan is “dat Malema nie soseer namens die armes van Suid-Afrika praat nie, maar dat hy finansieel volgestop word deur jong swart ondernemers wie se belange gedien word deur sy pleidooi om nasionalisering”.
Ten slotte beskryf Kees Broere Malema se idees in De Volkskrant (Amsterdam) as “ekonomiese populisme en rassenasionalisme”.
Volg Nuus24 op Twitter.
- Volksblad