Maledive: Lyfstraf vir meisie wat verkrag is
2013-02-27 10:33
Malé, Maledive – 'n Hof in die Maledive het 'n 15-jarige verkragtingslagoffer tot 100 houe lyfstraf en agt maande huisarres gevonnis nadat sy erken het dat sy voorhuwelikse seks in 'n aparte voorval gehad het, het 'n amptenaar Woensdag gesê.
Tydens 'n polisie-ondersoek na bewerings dat die meisie deur haar stiefpa verkrag is, het ondersoekbeamptes bewyse gevind dat sy seks met 'n ander man gehad het.
"Alhoewel sy reeds gevonnis is, sal die lyfstraf eers toegedien word sodra sy agtien word," het 'n amptenaar, wat anoniem wou bly, aan AFP gesê.
"Maar die vonnis sal onmiddelik toegepas word as sy dit so wil hê."
Voorhuwelikse seks is onwettig volgens die Maledive se streng Islamitiese wette.
Die meisie se stiefpa kan tot 25 jaar in die tronk deurbring indien hy skuldig bevind word aan 'n aanklag van verkragting én moord, nadat hy na bewering 'n baba, wat ná die beweerde verkragting gebore is, om die lewe gebring het.
– Volg Nuus24 op Twitter.
