Mafia-lede kry lewenslange tronkstraf
2011-04-15 10:31
Rome – Vier lede van die Napels-mafia is tot lewenslange tronkstraf gevonnis vir die moord op sewe mense in 2008.
Die moorde staan bekend as een van die bloeddorstigste misdade in Italië.
Giuseppe Setola, die Camorra-baas wat glo die meesterbrein agter die moorde was, en drie van sy handlangers is lewenslange tronkstraf opgelê.
‘n Vyfde beskuldigde is tot 23 jaar tronkstraf gevonnis. Volgens die nuusagentskap Ansa het dié persoon nie deelgeneem aan die moorde nie. Hy was betrokke by ‘n skietery.
Setola het skuld ontken in ‘n hof buite Napels.
Hy is drie weke gelede nóg ‘n lewenslange vonnis opgelê vir die moord op ‘n Italiaanse sakeman.
Die moord op die sewe mense, waarvan ses van hulle immigrante van Afrika was, is op 18 September 2008 in Castel Volturno gepleeg.
Die motief vir die moorde is nog nie duidelik nie. Daar word vermoed dat die moorde met dwelmhandel verbind is.
Volg Nuus24 op Twitter.
- Sapa - AFP