Madoff se broer ook nou vas
2012-06-29 15:27
New York – Die broer van die veroordeelde bedrieër Bernard (Bernie) Madoff, Peter, is deur die FBI in hegtenis vir sy aandeel in 'n finansiële bedrogspul waarin duisende beleggers se geld gesteel is.
Hy sal na verwagting skuldig pleit op die kriminele aanklagte teen hom.
J. Peter Donald, 'n woordvoerder vir die FBI, het gesê Madoff is Vrydagoggend by sy prokureur se kantoor in hegtenis geneem.
Madoff sal pleit op aanklagte van sameswering en die vervalsing van dokumente. Regeringsbronne sê hy het ingestem om tien jaar tronkstraf uit te dien, en om sy persoonlike fortuin op te gee.
Madoff, 66, wat 'n sleutelrol gespeel het in sy broer se beleggingsmaatskappy, se inhegtenisname kom drie jaar ná die bedrogspul aan die lig gekom het.
Bernard Madoff dien tronkstraf van 150 jaar uit. Hy het tot dusver volgehou dat hy alleen bewus was van die bedrogspul, wat duisende mense geraak het en miljarde dollars beloop het.
– Volg Nuus24 op Twitter.
- SAPA
