Ma tronk toe ná sy baba op hoofweg neersit

2012-07-11 07:30

Moskou – 'n Jong ma is in 'n hof in Rusland tot agt jaar tronkstraf gevonnis nadat sy haar nege maande oue seun op 'n hoofweg buite Moskou neergesit het.

Die ma het in die hof erken dat sy wou hê die kind moet sterf.

'n Verbygaande motoris het die kind, wat intussen aangeneem is, 10 minute later gered.

Die motoris het vroeër aan die Russiese media gesê hy het gedink hy het 'n hond of 'n kat gesien voor hy stilgehou het. Die vrou en haar broer het naby die pad gestaan om te kyk wat gebeur, het ondersoekbeamptes gesê.

Volgens die ondersoekbeamptes is die kind op 'n swak beligte gedeelte van die pad neergesit.

Die voorval het in Mei 2011 plaasgevind en die 24-jarige Elena Osina en haar 21-jarige broer, Alexander, het skuldig gepleit op die aanklag teen hulle. Alexander is tot nege jaar tronkstraf gevonnis.

Osina het vroeër aan die hof gesê sy het baie gesukkel nadat haar kêrel uitgetrek het. Haar ouers, by wie hulle gewoon het, het volgens haar ook begin kla.

Sy het ná die uitspraak gesê sy dink die straf is te swaar.

"Almal maak foute," het sy aan Channel One gesê.

– Volg Nuus24 op Twitter

- Sapa - AP