MIV-positiewe vroue eis ná sterilisasie
2010-09-07 08:48
Johannesburg - Minstens 16 MIV-positiewe vroue eis elk R1 miljoen van die Namibiese regering nadat hulle glo in staatshospitale gedwing is om hulle te laat steriliseer.
Die saak is onlangs in die Namibiese hooggeregshof in Windhoek hervat.
Gillian Parenzee van die AIDS and Rights Alliance for Southern Africa (Arasa) het gister aan Beeld gesê daar is nou gerugte van soortgelyke gevalle in Suid-Afrika.
Volgens Arasa het ’n 2008-verslag deur aktivistegroepe getoon minstens 40 vroue is in Namibiese hospitale gesteriliseer.
Dit is glo die eerste groepsgeding in sy soort in Suider-Afrika.
Die Namibiese departement van gesondheid en maatskaplike dienste voer aan die vroue het “ingeligte toestemming” gegee.
Sommige van die vroue beweer egter hulle was in kraam toe hulle vorms gegee is om te onderteken.
Hulle beweer hulle het nie geweet wat op die vorms gestaan het nie en het glo gevrees hulle sou mediese hulp geweier word as hulle dit nie onderteken nie.
Volgens Arasa is daar geen gesondheidsrede om ’n MIV-positiewe vrou se voortplantingsvermoë te beperk nie omdat antiretrovirale medisyne hul kans om die virus aan hul babas oor te dra feitlik uitwis.
Volgens Michaela Clayton van Arasa, ’n organisasie wat deelneem aan die veldtog teen gedwonge sterilisasie, word dié soort sterilisasie gedryf deur praktisyns “se persoonlike ideologieë oor MIV-positiewe vroue se reg om voort te plant” eerder as openbare gesondheidsoorwegings.
Die veldtog beywer hom die afgelope twee jaar om sulke gevalle oop te vlek.
Verteenwoordigers van Arasa het gister aan Beeld gesê inligting word bymekaargemaak oor beweerde voorvalle in Suid-Afrika.
Volgens Parenzee is dit moeilik om die vroue te oorreed om na vore te kom.
Talle kom van kulture waar hul MIV-status sowel as hul onvermoë om kinders te kry ’n stigma het.
“Ons vermoed daar is ook gevalle van mense wat nie eens weet hulle is gesteriliseer nie,” het sy gesê.
Die Namibiese vroue voer aan daar is onregmatig teen hulle gediskrimineer weens hul MIV-status en hulle is ontneem van hul waardigheid en reg om kinders te baar.
Die hofverrigtinge gaan voort.
- Beeld