MIV-lyers mag nie trou in Tsjetsjnië
2011-01-20 07:32
Grosni (Tsjetsjnië). – Aktiviste is ontstoke nadat geestelike Moslem-leiers hier gelas het dat paartjies wat wil trou, moet bewys hulle is MIV-negatief.
Die moefti (’n Moslem-regsgeleerde) se mediadiens het vandeesweek in ’n verklaring gesê diegene wat wil trou, moet mediese sertifikate voorlê wat bewys hulle is nie met die virus besmet nie. Daarsonder sal huwelike afgekeur word.
Rusland se MIV-epidemie is besig om handuit te ruk, vermoedelik weens heroïenverslawing waar gebruikers spuitnaalde deel. Volgens die Verenigde Nasies is sowat een miljoen mense daar MIV-positief, maar tot nou is Tsjetsjnië glo min geraak.
Die moefti se opdrag kom nadat hy verlede jaar gelas het dat alle eetplekke gedurende Ramadaan gesluit word en bendes gewapende mans gevra het om vroue wat weier om kopdoeke te dra, lastig te val. Die meeste mense slaan ag op sy wette omdat hulle hom as geestelike leier respekteer en hy bande het met Tsjetsjnië se onversetlike leier, mnr. Ramzan Kadyrof.
Minkail Ezhiev, ’n menseregte-aktivis in Grosnië, het gesê die opdragte val buite Russiese wette en druis in teen menseregte.
Volg Nuus24 op Twitter
- Reuters