M23-rebelle steeds in Goma

2012-11-29 13:48

Goma – Kongolese rebelle het nog nie 'n daadwerklike poging aangewend om uit die stad Goma te onttrek nie, het die Verenigde Nasies gesê.

Die VN se Veiligheidsraad het Woensdag gesê hy sal nog sanksies teen die M23-rebelle, en diegene wat hulle ondersteun, oorweeg. Spesifieke lande is egter nie genoem nie.

Die besluit is ook deur die VSA ondersteun.

Hillary Clinton, die VSA se minister van buitelandse sake, het Woensdag gevra dat alle partye wat by die konflik betrokke is, hulle steun aan die M23-rebelle in die Demokratiese Republiek van die Kongo moet staak.

Die rebelle het vroeër beweer dat hulle reeds uit die gebied begin onttrek het. Eduardo del Buey, die VN se adjunkwoordvoerder, het egter Woensdag gesê lede van die VN in die Kongo berig dat die M23-groep nog geen poging aangewend het om Goma te verlaat nie.

– Volg Nuus24 op Twitter
 

- Sapa - AFP