Lyk van seun dalk veermiste Duitser
2010-07-24 03:00
Madrid – Die lyk van ‘n kind wat glo ooreenkomste het met ‘n vyfjarige Duite seun wat in die suide van Spanje vermis geraak het, is gevind, het ‘n polisiewoordvoerder Vrydag gesê.
Duikers, spanne met honde en ‘n helikopter is Vrydag naby Cordoba uitgestuur as deel van die soektog na die seun, het amptenare gesê.
Die kind was in die suidelike Cordoba-distrik saam met sy ma op vakansie.
Die ma is Dinsdag in ‘n skoktoestand gevind, het ‘n verklaring gelui.
“Die lyk van ‘n minderjarige is in die omgewing gevind waar die soektog geloods is,” het ‘n woordvoerder gesê.
“Dit kan die vermiste seun wees, maar ons wag nog dat hy geïdentifiseer word.”
Die lyk is vroeg Vrydagoggend by Espiel, ‘n paar kilometer noord van Cordoba, gevind.
Amptenare het vroeër gesê dat die seun se ma, wie se identiteit nie weergegee is nie, in ‘n skoktoestand, “gedisoriënteerd en met kneusplekke, snye en tekens van dehidrasie” gevind is.
Sy is in die hospitaal opgeneem.
Die vrou het aan die polisie gesê dat sy en haar seun Duitsland sowat ‘n week gelede verlaat het, maar sy kon nie sê wat later gebeur het nie,
Temperature in die omgewing styg tot 40 grade Celsius hierdie tyd van die jaar.
Volgens getuies was die vrou en haar seun Sondag op ‘n visvang-uitstappie na die plaaslike Puente Nuevo meer.
Ander het weer gesê dat sy Maandag vir inwoners om hulp gevra het omdat haar motor gebreek het.
Die motor is Dinsdag gevind.
Volg Nuus24 op Twitter
- Sapa - AFP