Luukse skip sonder krag dobber by rowerkus
2012-02-28 07:03
’n Susterskip van die rampspoedige Costa Concordia dobber in donkerte gehul en met meer as duisend mense aan boord in die Indiese Oseaan by die Seychelle rond waar Somaliese seerowers baie bedrywig is.
Dít ná ’n brand Maandag in die kragkamer van die Italiaanse skip, die Costa Allegra, dit roerloos gelaat het.
Die brand in die kragopwekkingskamer is gou geblus en niemand is beseer nie, het die eienaars van die skip gesê.
Twee sleepbote is uit die Seychelle na die skip op pad, maar sal na verwagting op die vroegste eers Dinsdagmiddag daar aankom, het ’n top militêre beampte in die Seychelle Maandag gesê.
Die owerhede in die Seychelle het dit Maandagaand oorweeg om die passasiers vanaf ’n vliegveld op die Alphonse-eiland van die skip af te kry. Volgens Srdjana Janosevic, woordvoerder van die Seychelle se presidentskantoor, is daar gewapende wagte aan boord wat sal reageer as hulle aangeval word, maar dat geen seerowers in die gebied opgemerk is nie.
Dié voorval kom ses weke ná sy susterskip, die Concordia, ’n rif langs ’n klein Toskaanse eiland getref, dit omgeslaan minstens 25 mense omgekom het.
– Volg Nuus24 op Twitter
- Sapa - AP
