Luislang val Australiese kleuter aan

2013-01-07 15:07

Sydney – ‘n Australiese kleuter het 'n aanval deur 'n luislang in die vroeë oggendure oorleef, het die nuusagentskap AFP berig.

Die twee-jarige meisie se ma het om sowat 03:00 wakker geskrik en gesien hoe 'n luislang van 1,85 m lank om haar kind krul, het Tex Tillis, ‘n slanghanteerder, gesê.

Die ma het in die donker probeer om die slang se kop te gryp, maar kon dit nie raakvat nie, en die dier het die kind aangeval.

“Dit het onmiddelik begin om die kleuter te byt,” het Tillis gesê.

“Die ma het toe die slang van die kind af geruk.”

Tillis het bygevoeg dat die slang nie giftig is nie.

Die kleuter is na 'n hospitaal geneem, maar het net drie wonde opgedoen.

Tillis het later die reptiel na die ma en die kleuter geneem om vir hulle te wys hoe dit lyk. Hulle het besluit om die slang Cecil te doop.

– Volg Nuus24 op Twitter   
 

- Sapa - AFP