Luiperd verskeur 14-jarige meisie
2012-02-09 15:05
Katmandoe – ‘n Luiperd het ‘n 14-jarige meisie in die weste van Nepal weggesleep en verskeur, het die polisie Donderdag gesê.
Dit is die vyfde dodelike aanval deur dieselfde dier in slegs twee maande.
Die meisie het gras in 'n woud naby haar huis in die Baitadi-streek gesny toe sy deur die luiperd aangeval is, het Bishnu Bahadur Karki, ’n plaaslike adjunk-superintendent van die polisie, gesê.
“Die plaaslike inwoners het die verskeurde lyk, wat tot onder die nek geëet is, gister (Woensdag) in die woud gevind,” het hy gesê.
Karki sê drie jong meisies en ‘n 35-jarige swanger vrou is dood in die weke wat na Woensdag se aanval gelei het en die polisie vermoed dat dit dieselfde dier is wat vir al die sterftes verantwoordelik is.
“Die luiperd het die mense van Pancheshwor aanhoudend geterroriseer. Ons het die streek se bosboukantoor versoek om ons toe te laat om hom dood te maak, maar hulle weier en sê die wet laat ons nie toe nie,” het Karki gesê.
“Ons versoek om die luiperd aan ‘n dieretuin te oorhandig is ook van die hand gewys. Die inwoners en die polisie probeer hard om die luiperd te vang.”
Inwoners beweer die luiperd het nog drie mense in nabygeleë dorpe aan die Indiese kant van die grens doodgemaak.
– Volg Nuus24 op Twitter
- AFP