Lugruim in Europa bly gesluit
2010-04-17 07:49
Londen - Die grootste deel van die Lugruim in Europa bly gesluit nadat ‘n reuse-vulkaniese aswolk vanaf Ysland heelparty lughawens in Europa tot stilstand gebring het.
Owerhede in Italië het hul lugruim in die noorde van dié land tot Saterdag gesluit asook die lughawens in Milan en Venesië.
In Duitsland is alle internasionale lughawens, insluitende Frankfurt en Minchen gesluit. Swede en Noorweë het die lugruim in die ver noorde van dié lande veilig verklaar maar beide die hoofstede, Stockholm en Oslom se lughawens is steeds gesluit.
Amptenare in Engeland sê die lugruim hier sal tot minstens 19:00 Saterdag gesluit wees en die lugredery British Airways het al sy vlugte na en van lughawens in Londen vir Vrydag en Saterdag gekanselleer.
Die lugruim in Skotland en die noorde van Ierland is veilig verklaar en lughawens in Dublin en Cork is heropen.
Lughawens in Parys en 20 ander stede in Frankryk sal tot minstens Saterdagmiddag gesluit bly terwyl België ook sy lugruim tot Saterdagoggend gesluit het.
Switserland, Slowakye, Kroasië en Hongarye het ook hul lugruim gesluit en lughawens in Poland sal glo ook langer as verwag gesluit bly.
- Sapa