Lughawe-sekuriteit wêreldwyd hersien
2010-11-02 09:00
Londen – Regerings en lugdienste oor die wêreld heen het Maandag sekuriteitsmaatreëls in heroënskou geneem nadat pakketbomme van Jemen na Amerika in onderskeidelik Doebai en Brittanje onderskep is.
Die Britse premier, David Cameron, het ’n krisiskomitee saamgestel om te besluit oor Brittanje se reaksie nadat een van die pakkette Vrydag op ’n vragvliegtuig van United Parcel Service by die East Midlands-lughawe noord van Londen gevind is.
Die ander bom is in ’n rekenaardrukker se inkmagasyn ontdek in ’n pakket by die FedEx-fasiliteit in Doebai. Dié vonds blyk ’n skuiwergat in lugvrag-sekuriteit te wees wat passasiers se lewe in gevaar kan stel.
“Lugvrag word steeds beskou as die achilleshiel van die lugvaartbedryf,” het ’n kenner van lugvaartsekuriteit, Chris Yates, aan BBC gesê.
Qatar Airways het bevestig die Doebai-pakket is vervoer op een van sy passasiersvliegtuie van Sanaa in Jemen via Doha.
Cameron het Saterdag gesê die bom wat in Brittanje gevind is, was ontwerp om ’n vliegtuig uit die lug te blaas.
Die komplot kan oproepe versterk vir ’n toename in gebruik van beeldtegnologie wat plofstof kan opspoor, maar vragvervoerfirmas is onwillig om die onkoste van dié verbeterings te dra.
Hulle het verlede jaar met Amerikaanse en Europese beleidmakers koppe gestamp oor oproepe vir 100% skandering van seehouers. Planne vir volle skandering van 2012 is uitgestel.
Die Britse minister van binnelandse sake, me. Theresa May, sou Dinsdag die parlement inlig oor die bomkomplot en het Sondag gesê sekuriteitsmaatreëls rondom internasionale lugvrag in Brittanje sal hersien word.
Michael O’Leary, uitvoerende hoof van die Europese lugdiens Ryanair, het ’n beroep om gesonde verstand gedoen en gesê verdere sekuriteitsbeperkings op passasiers sal ondoeltreffend wees.
“Ons het lagwekkende regulasies in die afgelope jare gehad waar ons vroue se lipstiffies en bottels water van meer as 100mF gekonfiskeer het en mense hul skoene laat uittrek het. Dit het absoluut geen uitwerking op sekuriteit nie,” het hy aan die BBC gesê.
Beperkings op die dra van vloeistowwe is in 2006 ingestel ná die ontdekking van ’n Al-Kaïda-geïnspireerde komplot om transatlantiese vlugte op te blaas deur die gebruik van plofstofmateriaal wat as koeldrank verbloem is.
- Die Burger