Los Angeles: 3 dood in treurspel by aftreeoord
2012-11-21 14:26
Torrance – Drie mense is Dinsdag dood in wat blyk ‘n dubbele moord en ‘n selfmoord te wees by ‘n aftreeoord in die suide van Los Angeles, het die polisie gesê.
‘n Man in sy 80's het glo twee vroue in die Golden West Tower-woonstelle in Torrance geskiet en toe selfmoord gepleeg, het Robert Watt, ‘n polisiebeampte, gesê.
Die polisie is nie in dié stadium seker wat die motief vir die moorde is nie.
Inwoners van die aftreeoord het aan die NBC4-kanaal gesê dat die man die afgelope tyd vreemd opgetree het en dat verskeie inwoners hom nie meer by die kompleks wou hê nie.
“Mense is gewaarsku, maar niemand het iets daaraan gedoen nie, so ek weet daar gaan bloed op ‘n paar mense se hande wees,” het Alex Galindo, ‘n werknemer by die aftreeoord, gesê.
Watt sê die aftreeoord se bestuur het al verskeie klagtes oor die skieter ontvang maar het bygevoeg dat die polisie nooit in kennis gestel is nie.
– Volg Nuus24 op Twitter
- AP
