Lid van Pussy Riot sê betogings sal voortgaan
2012-10-11 09:30
Moskou – 'n Lid van die rock-groep Pussy Riot, wat onverwags uit die tronk vrygelaat is, het belowe dat die betogings sal voortgaan.
"Ons is nog nie klaar nie, ons gaan ook nie ons politieke betoging beëindig nie," het Yekaterina Samutsevich aan CNN gesê.
"Ons moet op so 'n manier te werke gaan dat hulle nie voor die tyd van ons konserte hoor en ons in hegtenis neem nie."
Samutsevich (30), Maria Alyokhina (24) en Nadezhda Tolokonnikova (22) is in Augustus tot twee jaar tronkstraf gevonnis vir 'n protesoptrede wat hulle teen pres. Vladimi Putin by Moskou se hoofkatedraal gehou het.
Die regter het beslis dat Samutsevich se vonnis opgeskort moet word omdat sy deur wagte uit die katedraal gegooi was, voordat sy kon deelneem aan die optrede.
"Die situasie in die land het vererger sedert ons optrede en die verhoor is 'n bewys daarvan," het sy in 'n onderhoud aan CNN gesê.
Samutsevich het gesê sy is goed in die tronk behandel en dat Alyokhina en Tolokonnikova "gaan goed aan" in die tronk ten spyte daarvan dat hulle "baie, baie ontsteld" is dat hulle weg van hul jong kinders geneem is.
"Hulle het my gelukgewens, hulle was baie gelukkig vir my en het my sterkte en alles van die beste toegewens," het sy gesê.
Samutsevich sê sy weet nie hoe dinge gaan verloop nie, maar het gesê dit is belangrik dat die Russiese mense verstaan dat geloofshaat nie die motief was vir hul betogings nie.
– Volg Nuus24 op Twitter.
- AFP
