Lewens van 27 Taliban-rebelle geëis
2010-04-06 22:05
Kaboel – Afganistan se weermag het die dood van 27 Taliban-rebelle bevestig nadat ’n grondaanval, asook ‘n lugaanval in die westelike provinsie van die land geloods is.
Gen. Jalandar Shah Behnam, ‘n bevelvoerder van die afdeling in die weste van Afganistan, het gesê troepe het met valskerms binne die Taliban-vesting, Badghis te lande gekom en militante vasgekeer.
Die aanval is deur Navo (Noord-Atlantiese Verdragsorganisasie)- en Afgaanse magte uitgevoer.
Die aanval het voor dagbreek begin en tot laat middag voortgeduur, het hy gesê.
Ten spyte van die 27 Taliban-rebelle wat gesterf het, is een Afgaanse soldaat doodgeskiet en vyf ander gewond.
Een Amerikaanse soldaat is gedurende die aanval gewond.
- Sapa-AP