Lede van mensehandel-sindikaat swaar gestraf
2012-03-08 11:01
Hanoi – Altesaam 29 mense is tot tronkstraf gevonnis nadat hulle die grootste mensehandel-sindikaat in Viëtnam bestuur het, het nuusberigte Donderdag gesê.
Die leier van die sindikaat, Tran Hoang Anh (42), is Woensdag tot 20 jaar tronkstraf gevonnis aan die einde van die week lange verhoor, het die Phap Luat-koerant berig.
Agt ander beskuldigdes het 18 tot 25 jaar tronkstraf ontvang, terwyl 18 tot tussen drie en 16 jaar gevonnis is.
Twee ander het opgeskorte vonnisse ontvang, het die An Ninh Thu Do-koerant berig.
Die sindikaat het jong vroue en meisies uit arm dorpe in die noorde van die land gelok met beloftes van werk wat goed betaal, waarna hulle aan bordele in China en Viëtnam verkoop is.
Die verdagtes is skuldig bevind aan misdade in verband met die uitsmokkel van nege vroue en 20 minderjariges tussen Februarie 2009 en Julie 2010.
Die polisie het 15 van die slagoffers gered en almal was jonger as 16 jaar.
Die sindikaat is in 2010 ontbloot toe ‘n 17-jarige meisie om hulp geroep het toe een van die lede treinkaartjies wou koop om haar van Hanoi na die Lao Cai-provinsie op die Chinese grens te neem.
Mensehandel kom wydverspreid in Viëtnam voor, waar hoë werkloosheid in plattelandse omgewings daartoe lei dat baie mense migreer.
– Volg Nuus24 op Twitter
- Sapa-DPA
