Las Vegas-skietery 'soos 'n rolprent'
2013-02-22 13:04
Las Vegas – Drie mense is dood en minstens ses is beseer toe die insittende van ‘n swart Range Rover in Las Vegas op passasiers in ‘n Maserati geskiet het.
Die Maserati het gevolglik in ‘n taxi vasgejaagm wat in vlamme uitgebars het.
Die polisie vermoed dat ‘n twis wat vroeër by ‘n kasino in die gebied plaasgevind het, tot die aanval in die hartjie van Las Vegas gelei het.
Verskeie groot hotel-kasino’s, soos die Bellagio, Caesars Palace en Bally’s, is in dié gebied geleë.
“Dit gebeur nie waar ons vandaan kom nie, nie op hierdie skaal nie,” het Mark Thompson, ‘n besoeker van Manchester in Engeland, gesê. “Ons het messtekery en bendegeweld, maar hierdie is soos iets uit ‘n film. Soos Die Hard of iets.”
Die polisie het gesê hulle is in kontak met beamptes in drie naburige state oor die Range Rover Sport met donker gekleurde vensters, kenmerkende swart wieldoppe en geen nommerplate. Die voertuig het die toneel omstreeks 04:20 verlaat.
Volgens sers. John Sheahan is die Range Rover laas naby die Venetian-oord gesien, waar dit noord gery het van die toneel.
Getuies het ook aan die polisie gesê dat die Range Rover en die Maserati van die nabygeleë middestad gekom het.
Die Maserati het die taxi getref, wat gevolglik in vlamme uitgebars het. Die bestuurder en passasier is dood. Die manlike bestuurder van die Maserati is ook dood en sy passasier is gewond.
– Volg Nuus24 op Twitter
- AP
