Lanza het ma verskeie kere in kop geskiet

2012-12-17 13:17

Newtown, Connecticut – Die gewapende man in die Connecticut-treurspel het sy ma verskeie kere in die kop geskiet voor hy na die Sandy Hook-skool gegaan het, waar hy 26 mense doodgeskiet het, het owerhede gesê.

Adam Lanza het Vrydag selfmoord gepleeg nadat hy 20 jong kinders en ses onderwysers by die doodgeskiet het. Hy het sy ma, Nancy, doodgeskiet met vuurwapens wat deel was van haar versameling.

Die mediese ondersoekbeampte het bevestig dat Lanza weens 'n selftoegediende kopwond gesterf het.

Die polisie het vroeër gesê verskeie magasyne en honderde patrone is ná die voorval by die skool gevind.

Die Amerikaanse president, Barack Obama, het die gebied Sondag besoek en onderneem om alles in sy vermoë te doen om te verseker dat skiet-tragedies soos dié nie herhaal word nie.

Hy het gesê die treurspel het die land met moeilike vrae gelaat en dat dié tipe voorvalle nie as roetine aanvaar kan word nie.

Obama het gesê om dié tragedies te beëindig, moet mense verander.

– Volg Nuus24 op Twitter

- Sapa - AP