Laaste veteraan van WO1 sterf
2011-05-05 14:57
Sydney – Claude Stanley Choules, die wêreld se laaste veteraan van die Eerste Wêreldoorlog, is in die ouderdom van 110 oorlede.
Volgens Choules se familie is hy Donderdag in ‘n verpleeginrigting in Perth, Australië, oorlede.
Sy kamerade in die Australiese vloot het hom nie verniet "Chuckles" genoem nie. Choules, wat in Brittanje gebore is, was bekend vir sy droë sin vir humor en nederige geaardheid.
Sy indrukwekkende prestasies sluit onder andere ‘n 41 jaar lange militêre loopbaan in. Hy het ook sy eerste boek op die ouderdom van 108 gepubliseer.
“Ons was almal lief vir hom,” het Choules se 84-jarige dogter, Daphne Edinger, aan AP gesê.
“Dit gaan hartseer wees om te dink dat hy nie meer hier gaan wees nie, maar dis hoe dinge gaan.”
Volg Nuus24 op Twitter.
- AP