Kuba begin soek na olie

2012-01-20 21:42

Havana – 'n Reuse-olieboortoring het aan die kus van Havana, die hoofstad van Kuba, aangekom om na olie te soek.

Kuba hoop om skattings te bevestig dat miljarde vate olie aan sy kus onontgin lê. Die boorwerk sal sowat 50 km van die hoofstad af plaasvind.

Die Spaanse oliemaatskappy Repsol RPF het gesê boorwerk sal binne die volgende paar dae begin om die omvang van die oliereserwes te bepaal. Die olieboortoring word vir $500 000 (sowat R3,9 miljoen) per dag aan Kuba geleen.

Na raming het Kuba tussen vyf en nege miljard vate ru-olie.

Indien dit wel so is, sal dit egter jare neem voor daar met produksie begin word.

“Die geoloë het hul werk gedoen. As hulle dit goed gedoen het, dan is die kanse goed dat ons groot sukses sal hê,” het Kristian Rix, ‘n woordvoerder van Repsol, gesê.

– Volg Nuus24 op Twitter.

- AP