Krokodil 'steel' haai by vissermanne

2010-01-30 04:57

Sydney - ‘n Groep Australiese vriende op hul jaarlikse visvang-vakansie moes hul vangs met alle mag beskerm toe ‘n krokodil dit raaksien.

Die vriende het ‘n klein haai op ‘n strand in die noorde van Australië gevang.

Die strand is ook bekend vir soutwaterkrokodille wat al in die verlede mense aangeval het.

Hulle het met 'n paal die haai by die strand begin opsleep toe hul kompetisie toeslaan.

‘n Groot krokodil kon dié happie nie laat wegkom nie en het die flappende haai met sy kake oop agterna gesit.

Een van die manne het sonder om te skroom die krokodil met die paal op sy snoet geslaan en dié is druipstert terug na die veiligheid van die oseaan  - om sy eie kos te gaan vang.

 - Sapa