Krok kry boudvleis toe man hom in rivier verlig
2012-08-25 11:14
Kuala Lumpur - ’n Krokodil het Vrydag met 'n groot hap van 'n Maleise konstruksiewerker se agterstewe weggekom toe die man 'n rivier in Borneo as 'n toilet gebruik.
Die man, bekend as Pai, het die twee meter lange krokodil in die oog geslaan toe dié hom aanval, waarna die reptiel besluit het om sy vangs te los.
Pai is rondom sy regter boudspier gebyt. Hy het hewig gebloei, maar die 32-jarige man het daarin geslaag om hulp te ontbied.
Pai het geweet die Sarawak-rivier is vol krokodille, maar het nietemin sy kanse onder 'n brug oor die water gevat.
Hy was net klaar met sy ablusie toe die krokodil hom van agter af byt.
"Ek was gelukkig dat die dier my laat gaan het toe ek hom in die oog slaan," het Pai aan 'n Maleise poniekoerant, Harian Metro, gesê.
"Toe hy my los, het ek êrens krag gekry om weg te hardloop en hulp te ontbied, selfs al was ek in baie pyn."
Pai, soos talle Indonesiërs, gebruik net een naam. Verskeie plaaslike koerante het Saterdag foto's van hom in die hospitaal gewys, waar hy op sy maag met verbande om sy heupe en middel lê.
Krokodilaanvalle is 'n groot probleem in Maleisië, waar verskeie mense die afgelope paar jaar deur dié reptiele gedood is.
Volg Nuus24 op Twitter.
- AFP
