Krisis in Filippyne ná storm verwoesting saai

2012-12-07 08:01

New Bataan, Filippyne – Pres. Benigno Aquino van die Filippyne het Vrydag gemeenskappe besoek waar Tifoon Bopha dié week verwoesting gesaai het, en gesê sy regering sal werk om oplossings te vind om lewensverlies in soortgelyke rampe te voorkom.

"Ons wil uitvind waarom hierdie tragedie plaasgevind het en hoe om te verhoed dat sulke tragedies weer gebeur," het hy in New Bataan, waar Tifoon Bopha veral verwoesting gesaai het, gesê.

Bykans 500 mense is dood in die storm, wat grootskaalse verwoesting gesaai het op die suidelike eiland Mindanao. Die eiland se piesangoeste is vernietig, en mynbedrywighede is ook beïnvloed.

"Ek is hier om te luister en om verduidelikings te hoor. Dis nie nou die tyd vir beskuldigings nie. Dis tyd om te werk," het Aquino gesê. Hy het onder andere gehelp om kospakkies uit te deel aan sowat 2 000 mense wat by 'n gimnasium skuiling gevind het. Dié gimnasium is een van die min strukture wat oorgebly het in die dorp, wat 'n bevolking van 48 000 mense het.

Sowat 306 000 mense is dakloos gelaat toe Tifoon Bopha Dinsdag die suide van die Filippyne getref het.

– Volg Nuus24 op Twitter.

- SAPA