Konsternasie toe haai op gholfbaan rondspartel

2012-10-26 16:16

San Juan — Werknemers by ‘n gholfklub in Kalifornië kon hulle oë nie glo nie toe hulle tot die redding van ‘n haai moes kom wat uit die lug op die 12de putjie van die baan geval en rondgespartel het.

Melissa McCormack, direkteur van die San Juan Hills-gholfklub, sê ‘n werknemer van die klub het die hondhaai (Triakis semifasciata) gesien val en dit na die klubhuis geneem.

Die haai het glo merke aan sy lyf gehad ná ‘n voël dit uit die see, wat sowat 8 km van die klub af is, opgeraap het.

Werknemers het die klein haai, wat sowat 1 kg geweeg het, in 'n tenk water gesit, en dit daarna vinnig see toe geneem.

McCormack sê die haai was eers verskriklik stil toe dit in die seewater teruggegooi is, maar dit het daarna skielik weggeswem.

– Volg Nuus24 op Twitter
 

- AP