Koningin besoek toneel van slagting

2011-05-19 08:44

Dublin – Koningin Elizabeth van Brittanje het Woensdag die Croke Park-stadion in die Ierse hoofstad besoek waar 14 Ierse burgerlikes in 1920 in ’n menseslagting aan die hand van Britse magte gesterf het.

Die koningin en pres. Mary McAleese van Ierland is by die stadion verwelkom deur 34 skoolkinders wat vlae met die kleure van die Ierse graafskappe en hul satellietklubs in Londen en New York geswaai het.

Sy het vier graafskapspelers in die kleedkamer ont- moet voor sy in die tonnel na die speelveld gestap het. Croke Park is die geestelike tuiste van Gaeliese sport.

Die koningin het lank vertoef by die einde van die tonnel, wat na die legendariese Gaeliese sokkerspeler Mick Horgan vernoem is. Hy was een van die burgerlikes wat 91 jaar gelede dood is.

Britse sportsoorte soos sokker en rugby is eens in Europa se vierde grootste stadion verbied.

Britse soldate het op 21November1920 altesaam 14 Ierse burgerlikes in die stadion doodgeskiet uit weerwraak vir ’n aanval vroeër dié dag waarin dieselfde getal Britse geheime agente dood is. Dit het ’n diep wond in die Ierse psige gelaat. Die slagting het die stadion in ’n sterker simbool van republikeinse, anti-Britse sentiment en Ierse kultuur omskep.

Die koningin se vierdaagse besoek aan Ierland word beskou as ’n simboliese versoeningsgebaar – iets wat vir die grootste deel van die koningin se heerskappy on- denkbaar was weens wedersydse wantroue. 

Volg Nuus24 op Twitter.

- Die Burger