Kongo: Stappe geëis teen soldate wat verkrag
2013-03-08 10:15
DRK – Die VN se vredesending in die Demokratiese Republiek van die Kongo het gedreig om sy ondersteuning aan twee Kongolese weermagbataljons te staak indien soldate wat glo talle vroue verkrag het nie vervolg word nie, het ‘n senior VN-beampte Donderdag gesê.
Die Verenigde Nasies het gesê 1 126 vroue is in November in Minova verkrag nadat Kongolese troepe na die dorp gevlug het toe sogenaamde M23-rebelle tydelik beheer geneem het oor die provinsiale hoofstad Goma.
Die seniorbeampte van die Verenigde Nasies, wat op voorwaarde van anonimiteit gepraat het, het gesê die twee Kongolese bataljons is aangesê om soldate wat die vroue glo verkrag het te begin vervolg, anders sal hulle die ondersteuning van die VN-vredesoldate verloor.
“Daar was baie verkragtings. Ons het ondersoek ingestel, ons het verskeie gevalle geïdentifiseer en ons dring aan dat die Kongolese beamptes wettige aksie neem teen daardie mense,” het die beampte gesê.
Hy het nie gesê hoeveel soldate aangekla is nie.
“”Aangesien niks merkwaardig in hierdie stadium gebeur het nie, het ons reeds twee eenhede van die gewapende magte van die Kongo kennis gegee dat as hulle nie vinnig optree nie, ons sal ophou om hulle te ondersteun,” het hy gesê.
Martin Nesirky, woordvoerder van die VN, het in Desember gesê dat die beweerde menseregteskendings tussen 20 en 30 November in en om Minova gepleeg is. Dit sluit in die 126 verkragtings en die moord op twee burgerlikes.
Nesirky het in daardie tyd gesê twee soldate is van verkragting aangekla, terwyl sewe ander aangekla is van plundery.
Die VN se vredesending in die Kongo, wat as Monusco bekendstaan, het ‘n mandaat om burgers te beskerm en sendings deur die Kongolese weermag te ondersteun.
– Volg Nuus24 op Twitter
- Reuters
