Komodo-draak val toergids aan

2013-02-20 16:17

Djakarta – ‘n Komodo-draak het ‘n toergids op ‘n afgeleë eiland in die ooste van Indonesië aangeval, het beamptes van ‘n nasionale park gesê.

Heru Rudiharto, ‘n beampte van die Komodo Nasionale Park, het Woensdag gesê ‘n 2,5 meter lange Komodo-draak het skielik verskyn en Abdul Rachman, wat vier Indonesiese toeriste naby die dier se nes verby geneem het, aangeval.

Rachman kon nie daarin slaag om homself met ‘n stok te verdedig nie en die Komodo-draak het sy regterkuit gebyt voordat ‘n ander gids gekom en dit weggejaag het.

Dinsdag se aanval was die tweede wat die afgelope maand in die park plaasgevind het. Twee werknemers van die park is gehospitaliseer nadat hulle twee weke gelede aangeval is.

Bedreigde Komodo-drake kom wild in die natuur voor in die oostelike Indonesiese eilande Komodo, Padar en Rinca. Hulle kan langer as drie meter word en daar is minder as 4 000 oor in die natuur.

– Volg Nuus24 op Twitter

 

- Sapa - AP